Wikidata/Zawjeźenje
• 
• 
• 
• -
- Za nowu wersiju toś togo boka, glědaj Wikidata:Zawjeźenje.
Wikidata jo nowy projekt za załožbu Wikimedia Foundation: licha, w zgromadnem źěle napórana, wěcejrěcna, sekundarna datowa banka, kótaraž gromaźi strukturěrowane daty, aby Wikipediju, Wikimedia Commons, druge Wikimedijowe projekty a druge wěcej pódpěrała.
Contents |
Co to groni?
Woglědajmy se zawjeźeńske wugronjenje bližej:
- Nowy projekt. Wikidata jo prědny nowy Wikimedijowy projekt wót starta Wikiwersity w lěśe 2006. Naraźenje za Wikidata jo se pjerwjej zgromaźeństwam Wikimedije pśedstajiło, a jo wjelgin pozitiwny wótgłos namakało.
- Lichy. Daty we Wikidata wózjawjaju se pód licheju licencu, kótaraž dowólujo zasejwužywanje datow w rozdźělnych situacijach.
- W zgromadnem źěle napórany. Daty we Wikidata zapódawaju a wótwarduju se wót wobźěłarjow projekta Wikidata, kótarež rozsuźuju wó pšawidłach napóranja wopśimjeśow we Wikidata.
- Wěcejrěcny. Wobźěłowanje, wužywanje, pśepytowanje a dalejwužywanje wopśimjeśa budu dopołnje wěcejrěcne byś. Daty, kótarež zapódaju se w někakejžkuli rěcy, budu ned we wšych drugich rěcach k dispoziciji stojaś; wobźěłowanje w někakej rěcy buźo móžno a witane.
- Sekundarna datowa banka. Wikidata njebuźo jano wugronjenja składowaś, ale teke jich žrědła a wótbłyšćujo tak wšakorosć k dispoziciji stojeceje wědy a pódpěra ideju pśekontrolěrujobnosći.
- Gromaźi strukturěrowane daty. Na rozdźěl wót Commons, kótaryž gromaźi medijowe dataje a Wikipedijow, kótarež napóraju encyklopediske nastawki, Wikidata zgromaźijo daty w strukturěrowanej formje. To dowólijo lažke dalejwužywanje tych datow pśez Wikimedijowe projekty a druge a zmóžnijo licakam, je lažko pśeźěłaś a "rozměś".
- Pódpěra za Wikimedijowe projekty. Jaden z nejwušych celow projekta Wikidata jo, Wikipediju pśez lěpjej wótwardujobne mjazyrěcne wótkaze a infokašćiki pódpěraś, z tym, až se źěłowe wobśěženje we Wikipediji reducěrujo a se jeje kwalita pówušujo.
- Pódpěra za druge wěcej. Kuždy móžo Wikidata za wjelgin wjeliku licbu rozdźělnych słužbow wužywaś.
Pótakem, co to groni?
Wjele nastawkow Wikipedije wopśimujo fakty a zwiski k drugim nastawkam, kótarež licak lažko njerozmějo, na pś. wobydlarstwo kraja abo rodne městno grajarja. We Wikidata móžoš te informacije zapódaś, na nałog, kótaryž zmóžnja licakoju, je pśeźěłaś: mašina móžo je w rozdźělnych rěcach k dispoziciji stajiś, aby je wužywała, aby pśeglědy datow ako lisćiny a diagramy napórała a aby na pšašanja wótegroniła, na kótarež dajo se tuchylu śěžko awtomatiski wótegroniś.
Za to změjo Wikidata wužywarski powjerch, kótaryž rozeznawa se wót wikija, kótaryž śi zmóžnja, ako Wikipedija tekst wobźěłaś; Wikidata změjo wužywarski powjerch na zakłaźe formularow, kótaryž buźo śi pomagaś, daty zapódaś, na nałog, kótaryž dajo se dalej pśeźěłaś, pak na wikiju pak njewótwisnje.
Kótary plan jo za jogo zwopšawdnjenje?
Nimska wótnožka Wikimedije jo zachopiła w aprylu 2012 na toś tom projekśe źěłaś; naš plan jo, zachopne wuwiśe w běgu lěta skóńcyś. Naš prědny kšac buźo, śi zmóžniś, mjazyrěcne wótkaze do centralnego repozitoriuma Wikidata donjasć a je pótom z Wikipedijow wužywaś. Naźijamy se, až toś ten cel dojśpijo se w lěśu 2012.
Pó tom buźomy na wužywarskich powjerchach za zapódawanje datow źěłaś. Buźomy pomałem system pólěpšyś a móžnosći za zwuraznjanje datow pówušyś (na pś. wót casa wótwisne daty, njewěste daty atd. zmóžniś). Smy se cele wědobne, až pśedstajenje wědy jo wjelgin śěžko a źěłamy kšac pó kšacu na pragmatiskem zakłaźe, kótaryž jo pód rozdźělnymi wobstojnosćami wužywajobny. Kak buźo to wuglědaś? To hyšći njewěmy, ale smy se wěste, až buźo zajmny puś tam.
To klinka wjelicnje. Kak mógu pomagaś?
Źěkujomy se za twój zajm! Wikidata móžo jano wuspěch byś, jolic jo kritiska masa sobustatkujucych, kótarež pśinosuju k projektoju. Smy se wědobne, až wjelgin rozdźělne zgromaźeństwa su na źěle na Wikidata zajmowane. Tuchylu nejlěpšy nałog, aby se běžnje informěrował a se na diskusijach wobźělił, jo aboněrowanje rozpósłańskeje lisćiny Wikidata.
Jolic coš južo daty pśidaś, buź pšosym sćerpny! Tós ta funkcionalnosć buźo se nazymu a ranu zymu 2012 wuwijaś. Jolic maš wjelike kopice datow, kótarež coš projektoju pósćiś, musyš samo hyšći sćerpnjejšy byś, dokulaž Wikidata nejpjerwjej trjeba źěłajuce zgromaźeństwo, nježli až móžo take dary wobźěłaś a integrěrowaś.
Jolic coš daty z Wikidata wužywaś, musyš znowego sćerpny byś. Akle gaž mamy źěłajuce zgromaźeństwo, změjomy zajmnu sajźbu datow. Comy zawěsćiś, až daty stoje we někotarych standardnych formatach k dispoziciji, aby móhł je tak lažko ako móžno zasej wužywaś.
Jolic sy wuwijaŕ, móžoš južo naš techniske naraźenje (nimski) cytaś. Smy swóje wuwijańske źěło w aprylu 2012 zachopili, a wšykno buźo se zjawnje pśewjasć, tak až kuždy móžo z našym žrědłowym kodom a drugim źěłom dochwataś. Pytaš nowe ideje? Opcionalne pakśiki w techniskem wopisanju by mógli wužytne byś, ale wóne by dejali se ako lutne ideje naglědaś. Móžoš bźeze wšogo na tom źěłaś.
Pšosym glědaj teke, až Wikidata wuwija se pó wuskem casowem planje, a tuchylu ma wobgranicowanu misiju. Jo kopica wěcow, kótarež Wikidata tuchylu njebuźo cyniś. Wikidata jo naš prědny kšac do pśichoda, gaž Wikimedija pódpěra strukturěrowane daty, a samo wěcej ako źinsa. Naźijamy se, až pśewóźijoš nas na toś tej droze.
Mam hyšći pšašanja
Pšosym pśecytaj Ceste pšašanja. Jolic tam njejo žedno wótegrono na twójo pšašanje, wužyj pšosym rozpósłańsku lišcinu Wikidata za swóje pšašanja a komentary abo pokaž nanejmjenjej nas na nje.
