Lo más destacao de Wikimedia, marzu de 2013
Lo más destacao del Informe de la Fundación Wikimedia y del informe d'inxeniería de Wikimedia de marzu de 2013, con una esbilla d'otros acontecimientos del movimientu Wikimedia importantes
Lo más destacao de la Fundación Wikimedia
Lua acelera les páxines y y da más poder a los collaboradores téunicos de Wikimedia
El 13 de marzu, activóse Lua pa les plantíes de toles wikis de Wikimedia. La sintaxis esistente pa les plantíes de testu wiki ye complicada y tien torgues: nun ufre bucles, por exemplu. Con Lua, los editores agora puen usar un auténticu llinguax de programación, col que tamién puen contribuir en proyeutos de programación esternos a Wikimedia. Pa les wikis de Wikimedia, Lua significa una bona ganancia nel rindimientu de les plantíes más usaes, como la de cites. Por exemplu, 300 cites d'un artículu de la Wikipedia n'inglés agora representense'n 3 segundos en llugar de 18 segundos.
Llanzamientu de les xubes dende'l móvil pa les aplicaciones y la web pa móviles
Na versión pa móviles de Wikipedia, los usuarios de smartphones agora puen xubir fácilmente una imaxe d'introducción a los artículos de Wikipedia que nun tengan una. Tamién en marzu, l'equipu de Móviles lliberó una aplicación dedicada pa Wikimedia Commons, que permite xubir ficheros de medios dende preseos Android ya iOS.
Les primeres subvenciones individuales al compromisu concedíes a proyeutos comunitarios innovadores
Los receptores de les primeres subvenciones individuales al compromisu anunciaronse'l 29 de marzu. Eses subvenciones financien proyeutos d'individuos o equipos pequeños d'una duración de seyes meses. Ente les mayores de les ocho subvenciones concedíes tan "The Wikipedia Library" (7.500$), que tien l'oxetivu de dar accesu a los editores a fontes fiables, donación d'editoriales; "La aventura de Uiquipedia" (10.000$), un xuegu na wiki pa editores nuevos, y un proyeutu pa definir en collaboración una visión del futuru de Uiquiesbilla (10.000 Euros).
Wikipedia Zero gana un premiu y llega a nuevos usuarios
Wikipedia Zero, que da accesu a persones alredor del mundu accesu per móvil a Wikipedia llibre de gastos por datos, ganó'l premiu SXSW Interactive de 2013 al «Activismu», superando a otros cuatro finalistes. Tamién en marzu, Wikipedia Zero quedó disponible pa otros más de 55 millones de suscriptores en Rusia, como parte d'una asociación con Beeline (VimpelCom). Esti foi el mayor llanzamientu del equipu de Wikipedia Zero fasta güei. El mesmu mes, anuncióse una nueva asociación de Wikipedia Zero con Axiata Group, qu'espanderá'l programa en Indonesia, Malasia, Camboya, Sri Lanka y Bangladex esti añu.
Alcuentru d'Ombudsmen, podría espandese'l campu de trabayu
En marzu, l'equipu LCA de la Fundación agospió a cinco de los siete miembros de la Comisión d'Ombudsmen (defensores del pueblu) en San Francisco, na qu'estos miembros de la comunidá d'alredor del mundu alcontraronse unos con otros en persona por primera vez. Consultaron con dellos departamentos de la WMF y dieron les sos opiniones no que cinca a la protección de la intimidá ya'l trabayu de los alministradores. Formada en 2006, la Comisión d'Ombudsmen actualmente tien la xera d'investigar les quexes por supuestos frayamientos de la política de protección de la intimidá en representación del Conseyu de direición. Propusose que la Comisión tamién tendría de tener permisu pa xestionar les quexes sobro les polítiques de comprobación d'usuariu y supervisión globales. Ta en preparación una RfC (solicitú de comentarios) sobro esto.
Datos y tendencies
Visites úniques globales pa febreru:
- 483 millones (-1,12% comparao con xineru; +1,53% comparao col añu anterior)
- (Datos de comScore pa tolos proyeutos de la Fundación Wikimedia; comScore espublizará los datos de marzu a finales d'abril)
Solicitúes de páxines en marzu:
- 21,5 miles de millones (–1,1% comparando con febreru; +24,8% comparando col añu pasáu)
- (Datos del rexistru del sirvidor, tolos proyeutos de la Fundación Wikimedia incluyendo l'accesu per móvil)
Editores rexistraos activos en febreru de 2013 (>= 5 ediciones/mes nel espaciu principal, sacante los bots):
- 78.083 (-7,53% comparando con xineru / -2,43% comparando col añu anterior)
- (Datos de la base de datos, tolos proyeutos de la Fundación Wikimedia).
Report Card (qu'integra dellos datos estadísticos y tendencies de los proyeutos de la WMF) de febreru de 2013:
Finances
 |
 |
(La información financiera ta disponible sólo pa febreru de 2013 nel momentu de facer esti informe).
Tola información financiera presentada ye pal mes acabáu y pal añu acabáu a 28 de febreru de 2013.
| Ingresos | $35,650,340 |
|---|---|
| Gastos: | |
| Grupu d'Inxeniería | $9,379,205 |
| Grupu de Collecha de fondos | $2,411,055 |
| Grupu de Beques y Programes | $3,935,546 |
| Grupu de Gobiernu | $504,987 |
| Grupu Llegal/Promoción Comunitaria/Comunicaciones | $2,029,585 |
| Grupu Finances/Recursos Humanos/Alministración | $3,702,999 |
| Total de Gastos | $21,963,377 |
| Total de superávit | $13,686,963 |
- Los ingresos del mes de febreru son $1,89MM ente que lo planiao foi $276K, aproximadamente $1,61MM o 585% sobro'l plan.
- Los ingresos añales a la data son $35,65MM ente que lo planiao foi $30,46MM, aproximadamente $5,19MM o 17% sobro'l plan.
Los gastos del mes de febreru son $4,25MM ente que lo planiao foi $4,03MM, aproximadamente $215K o 5% por encima del plan, principalmente por aciu de de mayores gastos del capital compensaos por gastos de personal, agospiamientu d'internet, y desembolsu de subvenciones más baxos.
- Los gastos añales a la data son $21,96MM ente que lo planiao foi $25,94MM, aproximadamente $3,98MM o un 15% por debaxo del plan, principalmente por aciu de gastos de personal, gastos de capital, agospiamientu d'internet, subvenciones del FDC executaes, subvenciones de proyeutos de la WMF y gastos de viaxes parcialmente compensaos por gastos llegales y tarifes bancaries mayores.
- La disponibilidá monetaria ye de $40,68 millones a 28 de febreru de 2013.
Otres actividaes destacaes del movimientu
La fase 2 de Uiquidatos va tando disponible na Wikipedia
El 27 de marzu, l'almacén central de datos de Uiquidatos quedó disponible pa usase nes primeres 11 Wikipedies. Exemplu: Nun artículu de Wikipedia sobro Yahoo!, el testu wiki "{{#property:p169}}" devolverá "Marissa Mayer", porque ella ye la direutora executiva de la empresa. El llanzamientu na Wikipedia n'inglés y nes versiones de les otres llingües esperase pa entrao abril.
.JPG)
Valoración del éxitu del proyeutu "Mediagrant" pa documentar reserves naturales
Wikimedia de la República Checa ta acabante d'asoleyar una valoración del resultáu del so proyeutu "Mediagrant", financiáu con una subvención de la Fundación Wikimedia. Dende 2011 esti proyeutu vien financiando los gastos de viaxe de les escursiones fotográfiques de voluntarios de Wikimedia a árees naturales protexíes de la República Checa. L'oxetivu ye documentar plantes y animales poco comúnes ya'l propiu área. De momentu ficieronse 74 viaxes a 298 llugares, ya'l capítulu calcula que el costu mediu de cada foto ye de 3,08 Kč (unos 0,12 €).
WikiAfrica ufre un espaciu físicu pa les collaboraciones con Wikimedia en Camerún
Nun centru d'arte de Douala, Camerún, equipóse una sala d'ordenadores con accesu a Internet d'alta velocidá pa les persones del llugar que quieran collaborar en proyeutos de Wikimedia. Creese que la falta d'ordenadores y conexones son unu de los motivos de la escosa cobertura de temes africanos na Wikipedia. Los visitantes del espaciu WikiAfrica reciben ayuda de personal capacitáu pa editar la Wikipedia. El proyeutu WikiAfrica Camerún tamién incluye un miembru de Wikimedia permanente y dellos talleres, y tien l'encontu de la Fundación Orange.