Wikipedia Abstracte/Concurso de nomination pro Wikipedia Abstracte

Per favor, adjuta a eliger un nomine pro le nove projecto wiki de Wikimedia, que es provisionalmente cognoscite como Wikipedia Abstracte. Iste projecto essera un wiki pro permitter a usatores scriber articulos de Wikipedia in qualcunque lingua per combinar datos de Wikidata usante functiones de Wikifunctiones. Istes pote esser usate postea per qualcunque Wikipedia (e altere sitos).

Durante le annos, le termino "Wikipedia Abstracte" se ha monstrate de esser un nomine imperfecte. Illo pote esser ambigue e confuse: personas pensa de arte abstracte, o qualcosa relative al informatica o mathematica, o illes pensa de un Wikipedia facite de summarios (abstracts in anglese: curte summarios, p.ex. de documentos de investigation scientific o de articulos). Illes rarmente pensa del notion intendite: le contrasto philosophic inter abstracte e concrete. Pro le beneficio del projecto, nos conduce un concurso de nomination pro trovar le nomine le plus adequate ante le apertura de iste nove projecto.

Le scopo de iste concurso de nomination es crear un nove nomine descriptive que adjuta le gente a comprender le scopo del nove wiki de Wikimedia le plus facilemente possibile. Le processo detaliate infra es intendite a adjutar a incoragiar multe submissiones possibile, e postea reducer los al electiones principal que communica clarmente ille significato.

Le chronologia pro propositiones e votos es date infra. Nos expecta haber finite le processo de voto verso le initio de decembre, e nos planifica annunciar le nomine al initio de 2026 (ma retardationes es possibile, dependente del nomine specific selectionate).

Que es Wikipedia Abstracte?

Un explication visual del projecto Wikipedia Abstracte e Wikifunctiones.

Al momento, le termino "Wikipedia Abstracte" refere al scopo a longe termino: que Wikifunctiones, un bibliotheca de functiones, permittera le creation de articulos independente del lingua in un nove projecto. Quando le partes de iste projecto essera establite, isto significara que qualcunque wiki – particularmente Wikipedias de parve a medie dimensiones – potera augmentar dramaticamente le numero de articulos disponibile in lor lingua. Illo significa etiam que redactores pote condivider cognoscentias de lor cultura e contextos con un audientia plus grande e plus global.

In altere parolas: nos potera combinar le functiones de Wikifunctiones, con le datos e informationes linguistic in Wikidata, pro generar phrases de linguage natural in omne linguas supportate. Illos pote esser usate per Wikipedia (o altere sitos).

Wikifunctions disveloppa un catalogo de functiones pro realisar iste vision. Le parte de Wikipedia Abstracte del projecto ha comenciate con nostre labor commun super functiones de generation de linguage natural, como functiones morphologic.

Plus detalios sur le projecto general se trova a Wikipedia Abstracte.

Chronologia

• 6 de octobre: Publicar iste pagina e demandar commentos; demandar traductiones; demandar a voluntarios multilingue de verificar le propositiones durante le phase de submission.
• 15 de octobre: Annuncios de rememoration pro submitter propositiones, e participar in le prime votos.
• 20 de octobre: Le prime torno de votation communitari comencia.
• 3 de novembre: Fin del prime torno de votation; prime examine juridic initia pro le 6 nomines le plus alte. Sollicitation de un aviso del equipa Imagine de marca (Branding).
• 19 de novembre: Le secunde torno de votation communitari comencia.
• 1 de decembre: Fin del secunde torno de votation; verification e contage del votos.
• 3 de decembre: Annuncio del resultatos detaliate del votation; un secunde examine juridic comencia pro le prime nomine(s).
• Initio de 2026 (planificate): Annuncio formal del nove nomine del projecto.

Criterios pro propositiones de nomines

• Le nomine debe referer o esser connectite al scopo del wiki, illo de esser un collection de articulos scribite in un notation independente del lingua e rendite disponibile in tote le linguas supportate. Un bon nomine probabilemente:
  • usa terminos de movimento establite, que es ben cognoscite e recognoscibile como "Wikipedia" o "Wiki";
  • es generic e combina un adjectivo con un marca Wikimedia existente, p.ex. "Wikipedia Abstracte";
  • mitte in evidentia un detalio clave del projecto (pensa al "data" in "Wikidata") a fin que on ha un idea del objectivo del projecto a prime lectura o audita;
  • es simple a dicer in alte voce e facile a scriber.
• Le nomine debe esser ben traducibile.
  • Un gruppo de voluntarios examinara le propositiones in lor proprie lingua(s), e addera commentarios de discussion si il ha alcun problemas.
  • Le wiki pote esser create a "foo.org" o "foofoo.wikipedia.org". Isto non es actualmente decidite e va depender de decisiones technic e juridic. Nota que un subdominio que es un codice de lingua non esserea possibile.
• Le nomine non debe violar le derectos de proprietate intellectual de un tertie parte, e es subjecte a un examine final per un consiliero juridic pro assecurar que illo non lo face.

Regulas pro le submission de nomines

• Numero de submissiones: Durante le periodo de submission, tu pote submitter tante nomines como tu vole. (Duplicatos essera consolidate ante de votar.)
• Accordo implicite per submission:
  • (a) Per submitter, tu recognosce implicitemente que tu ha legite e accepta iste regulas.
  • (b) Per submitter nomines, tu accepta de entrar in un contracto pro assignar tote tu derectos in tu submission al Fundation Wikimedia, includente omne derectos de autor, marcas registrate, publicitate, e omne altere proprietate intellectual o altere derectos de proprietate.
  • (c) Tu garanti que tu (o le Fundation Wikimedia) es le proprietario de omne derectos de autor, marcas registrate, derectos moral, de publicitate, e altere derectos intellectual e de proprietate sur le nomine proponite e que, a tu cognoscimento, illo non viola alcun derectos de tertios.
• Discordias: Ben que nos spera que il non ha discordia inter te e le Fundation Wikimedia, nos debe fixar alcun regulas sur como omne discordias que pote occurrer essera tractate. Per participar in le processo de selection de nomine, tu accepta que tu submission, tu assignation de derectos in illo, e omne discordia essera governate per le leges del Statos Unite de America e essera portate in un corte de jurisdiction competente in le Citate e Contato de San Francisco, California.

Detalios del processo de nominar

1. Periodo de submission: Il ha un prime voto durante le periodo de submission, e le discussion es incoragiate. Nomines pote esser modificate durante iste periodo, e derivatos pote esser submittite. Tote le nomines debe conformar se al regulas e criterios. Per favor, sia particularmente amabile e constructive durante iste periodo de excambio intensive de ideas.
2. Post isto, nos introduce duo nivellos de visibilitate pro le votation: Le 20 propositiones le plus alte, approximativemente, per numero de appoios in iste puncto, essera visibile in le pagina de votation predefinite. Il habera alora etiam un secunde pagina con tote le propositiones a votar, al qual liga le pagina principal de votation, le secunde nivello.
   • Durante le voto, nos verificara, circa un vice per die de labor, si il ha alcun propositiones que debe esser displaciate al pagina principal de voto o eliminate de illo. Nos emplea alcun judicamento hic, ma in principio, si alicun cosa ha plus de supporto que le propositiones le minus supportate in le pagina principal de votation, illo debe esser situate sur le pagina principal de votation.
   • Adder propositiones totalmente nove essera possibile etiam post le 19 de octobre, ma solmente al lista complete de propositiones, i.e. le secunde nivello.
3. Torno de elimination: Post le periodo de submission, le registrationes es presentate in exposition aleatori durante al minus un septimana de votar.
   • Cata votator pote votar pro tante candidatos como ille vole:
4. Revision del finalistas: Post le determination del sex submissiones con le plus votos, un consiliero juridic facera un examine initial rapide del sex nomines le plus votate pro deteger possibile problemas juridic, investigar le possibilitate de registrar los como marca commercial global, e determinar si illos es appropriate.
5. Voto final: Al minus sex nomines pote esser includite in le voto final e presentate in un presentation aleatori pro le votation. Le votos essera computate per le methodo de scrutinio instantanee a torno unic (Instant-runoff). Le votantes forni un ordine de preferentia del propositiones.
6. Examine juridic final: Un consiliero juridic va exequer un examine profunde del prime nomine. Si, secundo le consiliero juridic, le nomine de prime selection non es appropriate, a causa de problemas juridic (marca registrate, derecto de autor, etc.), le nomine essera retirate del consideration (con un explication public del ration) e le nomine de secunde selection essera examinate usante le mesme criterios. Si le nomine de secunde selection es inacceptabile, le consiliero juridic continuara per le lista usque al prime nomine disponibile e clar.

Eligibilitate e regulas pro votar

'Cata persona pote votar solmente desde un conto. In le prime torno de votar, tu pote votar pro tante nomines como tu vole. In le secunde torno de votar, tu classifica le optiones. Tu pote usar le gadget (si tu es sur un navigator de computator de scriptorio), o tu pote votar manualmente per classificar tote le sex candidatos (lista los per numero in ordine descendente de preferentia) sequite per tu signatura in un sol linea. Si tu vota plure vices e cambia de idea, solmente tu ultime linea de voto essera prendite in conto.

Tu pote votar desde un conto registrate que tu possede in un wiki de Wikimedia (tu pote votar solmente desde un sol conto, non importa quante contos tu possede, ben que tu pote votar pro tante nomines como tu vole). Pro qualificar se, iste conto debe:

• non esser blocate sur plus de un projecto; e
• non esser un robot; e
• haber apportate al minus 25 modificationes ante le 1 de septembre 2025 sur qualcunque wiki public de production de Wikimedia (como Wikipedia, Wikifunctiones, Commons, Wikisource, etc.).

In ultra, le membros actual e passate del Consilio de Administration e del Consilio Consultative del Wikimedia Foundation ha le derecto de votar.

Contage del votos del secunde torno: Usque sex candidatos entra in le secunde torno de votar. Al fin del periodo de votar, usante un modification del systema de scrutinio instantanee a torno unic, le prime (o sol) selection de cata votator essera contate e usate pro ordinar le submissiones per preferentia. Cata prime (o sol) selection conta como un voto pro le submission eligite. Si, a iste puncto, il ha un majoritate simple, iste submission entrara in le examine juridic final. Si il non ha un majoritate simple, le submission con le minus votos essera eliminate, e tote le votos que exprimeva un prime selection pro iste submission essera recontate pro lor secunde selection. Isto essera repetite usque un submission ha un majoritate simple de tote le votos remanente. Le submission resultante alora essera submittite a un examine juridic final. In caso que le submission falle in iste examine, nos simplemente eliminara ille submission e initiara le processo de contage de novo, usque un submission passa le examine juridic final. Necun tertie torno de votar es planificate.

Regulas de participation

Per favor, resta civil e polite durante le discussiones. Iste concurso es pro nominar le projecto, non pro usar lo como un tribuna pro discuter iste o altere projectos in general. Si tu vole discuter le projecto, per favor, visita iste pagina. Discussiones que non tracta del nomine, ma del projecto, pote esser displaciate a ille pagina.

Resultatos del prime torno de votation

In le prime torno de votation ganiava le sequente propositiones:

• Abstract Wikipedia
• Wikicore (regrettabilemente debeva esser removite pro rationes juridic.)
• Multilingual Wikipedia
• Wikiabstracts
• Wikigenerator
• Proto-Wiki

Pro vider tote le propositiones submitte e lor votos, vide le lista complete de propositiones e votos.

Secunde torno de votation

Le secunde torno de votation ha terminate. Le publication del resultatos preliminar es expectate in le proxime poc dies.