Fundraising 2010/Appeal/pam

From Meta, a Wikimedia project coordination wiki

Apulu nang banua ing milabas, aliwa la lawe kaku deng tau neng pákisabian ku la tungkul king Wikipedia.

Sabian tamu namung mágduda la reng negosianti king ideang deng taung kusang sasaup (volunteer) manibat king mabilug a yatu maliari lang miabe-yabe bang maglalang mákapagmulalang pamipitipun ning beluan ning tau – para king bukud a sangkan ning pamirake.

Alang patalastas o advertisement. Alang tubu. Alang aliwang sangkan.

Apulung banua kaibat ning kayang pamitátag, maigit nong 380 miliun a tau deng gágamit king Wikipedia balang bulan – alus metung a katlu king dake ning yatung makatuglung king Aptas o Internet.

Ya ing kalimang pekasikat a karinan-Aptas o website king yatu. Deng mumunang apat, mítikdo la ampong mamámantiní kapamilatan da reng biliun-biliung dollar king puhunan, mangáragul a bilang da reng tauan kareng cumpania, ampong alang patugut a pamamisali o marketing.

Dapot e no kalupa ning Wikipedia deng karinan-Aptas o website a pang-negosiu. Iti, metung yang bageng lelangan ning comunidad o ning balen, at sinulat de reng volunteer o kusang sasaup a manambag tunggal-tunggal a articulu. Kayabe ka king kekatamung comunidad. At susulatanan daka ngeni bang maniad king saup mu para king pamaningat ampong pamanatili ning Wikipedia.

Nung abe-abe tamu, asundu ta yang alang bayad ampong alang advertising. Maliari ta yang ataglus a makabusni – at maliari mung gamitan ing impormasiun king Wikipedia king sanumang paralang buri mu. Ataglus ta mu ing kayang pamagdagul – at mikakalat king beluan kareng sablang lugal, at managkat king pamakiabe da reng anggang tau.

Banua-banua, king panaung iti, abutan da kayu ampo reng aliwa king mabilug a comunidad a Wikipedia ba yang mitaglus ing abe-abe tamung proyectu kapamilatan ning pamagkalub $20, $35, $50 o maigit pa.

Nung páulagan me ing Wikipedia antimong pánibatan ning impormasiun – ampong pánibatan ning inspirasiun – sana pilinan mung kimut ngeni.

King sablang kayapan,

Jimmy Wales

Talatátag, Wikipedia

Susug: Ing Wikipedia tungkul ya king upaya da reng taung anti kekatamung makagawang makapagmulalang bage. Deng taung kalupa tamu ing susulat king Wikipedia, tunggal-tunggal a salita. Deng taung kalupa tamu ing magpondu kaniti, tunggal-tunggal a pamanambag. Iti, katibayan ne ning misásanmetung tamung upayang ibayu ya ing yatu.