Wikimedia Norge/Njuolggadusat

From Meta, a Wikimedia project coordination wiki

WIKIMEDIA NORGA NJUOLGGADUSAT

Mearriduvvon vuođđudančoahkkimis 23.06.2007.

§ 1 Álgu

a) Organisašuvnna namma lea Wikimedia Norge. Wikimedia Noreg ja Wikimedia Norga leat bálddalasti nammahámit.

b) Wikimedia Norga čuovvu Wikimedia Foundation višuvnnaid ja njuolggadusaid friddja čuvgehusbargguid ektui. Jos bohciida guokteoaivvilvuohta Wikimedia Norgga ja Wikimedia Foundation gaskkas, de galgá ášši čovdojuvvot «Agreement between chapters and Wikimedia Foundation» vuođul.

c) Wikimedia Norge lea miellahttusearvi.

d) Dárogiela girjegiella, ođđadárogiella ja davvisámegiella leat searvvi ovttadássásaš gielat. Njuolggadusat galget leat čállojuvvon seammálahkái njeallje – 4- gillii, giellahámit: dárogiela girjegiella, ođđadárogiella, davvisámegiella ja eaŋgalsgiella. Njuolggadusat jorgaluvvojit dárogiela girjegielveršuvnnas, mii dasto lea originálagiellan.

§ 2 Ulbmil

a) Wikimedia Norgga ulbmil lea doarjjut Wikimedia dárogielat ja sámegielat prošeavttaid dáinna lágiin ahte:

1. čohkket ruđalaš doarjaga skeaŋkkaid ja doarjjaortnegiid bokte, ja dáid ruđaid juohkit.

2. váldit oasi prošeavttaidgaskasaš koordinerenbarggus, ja ovttasbargat olgguldas oasseváldiiguin jus dakkár ovttasbargu lea ávkin Wikimedia prošeavttaide.

3. nannet ovttasbarggu eará davviriikkaid Wikimedia prošeavttaiguin.

4. márkanastit Wikimedia prošeavttaid.

5. doaibmat ráđđadallanorgánan eiseválddiid ja servviid ektui dahkkivuoigatvuođagažaldagaid hárrái.

6. prošeavttaid ovddas leat formálalaš interneahtadomeanaid eaiggádeaddjin. Searvi ii galgga ieš mearridit dáid geavaheami, galgá čuovvulit iešguđetge prošeavttaid mearrádusaid.

§ 3 Miellahttovuohta

a) Juohkehaš gii doarju searvvi ulbmila sáhttá šaddat miellahttun.

b) Jahkečoahkkin mearrida jahkásaš miellahttomávssu.

c) Stivra sáhttá lihccut miellahtuid mat bilidežžet Wikimedia Norgga dahje Wikipedia doaimmaid dahje beaggima. Jahkečoahkkin mearrida lihccuma, ja jahkečoahkkin lea maid guoddalanorgána. Lihcuhallon miellahtuin ii leat šat jienastanvuoigatvuohta, go eai šat atnojuvvo miellahttun. Lihccuhallon miellahtut eai ge sáhte doaibmat Wikimedia Norgga luohttamušvirggiin.

§ 4 Jahkečoahkkin

a) Wikimedia Norgga dábálaš jahkečoahkkin lágiduvvo jahkásaččat ovdal cuoŋománu loahpa. Stivra mearrida čoahkkináiggi, čoahkkinhámi, ja vejolaččat čoahkkinbáikki.

b) Jahkečoahkkin galgá unnimusat dáid áššiid meannudit:

1. Jahkedieđáhus ja rehketdoallu maid revisor lea revideren

2. Bušeahtta ja miellahttomáksin

3. Eará áššit

4. Válggát nu mo § 6 čilge.

c) Jahkečoahkkin galgá almmuhuvvot searvvi ruovttosiiddus unnimus guokte – 2 - mánu ovdalgihtii. Eará áššit galget leat stivrra hálddus unnimus guokte – 2 – vahkku ovdal jahkečoahkkima. Maŋimusta ovtta – 1 – vahkku ovdal čoahkkima galget buot áššebáhpárat leat álmmuhuvvon.

d) Válgalávdegoddi (vrd. § 7) ovddasvástida válggaid ja dáid čađaheami.

e) Jienastanvuogatvuohta lea sis geat leat miellahttomávssu máksán, geat leat leamaš registrerejuvvon goit ovtta Wikimedia dárogiel – dahje sámegielprošeavttain unnimus golbma mánu, ja geat dasa lassin leat redigeren unnimusat 400 háve.

f) Buot miellahtut geain lea jienastanvuogatvuohta, lea maid vuoigatvuohta buktit ovdan áššiid jahkečoahkkimii. Vihtta – 5 - eará miellahtu galget doarjut evttohusa ovdalgo sáhttá meannuduvvot.

g) Jus unnimus guoktelogi – 20 – miellahtu dahje stivra gáibida, de galgá gohččot erenoamáš jahkečoahkkimii dábálaš jahkečoahkkima njuolggadusaid mielde. Erenoamáš jahkečoahkkin meannuda dušše áššiid man birra lea čállojuvvon čoahkkingohččumis.

§ 5 Stivra

a) Wikimedia Norggas stivrras leat ovcci – 9 – miellahtu.

b) Stivrras leat jođiheaddji, nubbejođiheaddji, ruhtadoalli, čálli ja vihtta stivralahtu. Jahkečoahkkin vállje jođiheaddji ja nubbejođiheaddji. Muđui stivra konstituere iežas.

c) Stivra vástida Wikimedia Norgga beaivválaš doaimmas, dása maid gullá bargoaddiovddasvástádus.

d) Stivra vástida searvvi ruhtadilis. Stivra ovdanbuktá reviderejuvvon rehketdoalu jahkečoahkkimii. Stivra juohká čujuhan- ja háldenrievtti.

e) Stivra čoahkkána goit golbmii jahkái. Vurdojuvvo ahte stivralahtut dollet dássidis oktavuođa e-mailla, IRC dahje eará gulahallangaskaomiid bokte.

f) Mearrádusat dahkkojit dábálaš eanetloguin. Stivrras lea mearridanváldi go unnimus vihtta stivralahtu jienastanvuoigaivuođain leat sajis. Jus muhtun áššis leat goabbáge bealde seamma olu jienat, de lea jođiheaddjis dubbaljietna.

§ 6 Válggat

a) Jahkečoahkkin vállje stivrra § 5a mielde, ja válgalávdegotti § 7b mielde.

b) Evttohasat berrejit leat almmuhuvvon guokte – 2 – vahkku ovdal dábálaš válggaid.

§ 7 Válgalávdegoddi

a) Válgalávdegotti bargu lea lágidit ja bearráigeahččat buot dehálaš válggaid Wikimedia Norggas.

b) Lávdegottis leat goit golbma searvvi miellahtu, geat leat fásta buvttadeaddjit muhtun prošeavttain mii lea searvái čadnon.

c) Válgalávdegoddi doaibmá maiddái bearráigeahččanlávdegoddin, ja galgá danin bearráigeahččat ahte rehketdoallu ja stivrra bargu čuvvot searvvi njuolggadusaid.

§ 8 Njuolggadusrievdadusat

a) Miellahtut sáhttet evttohit njuolggadusrievdadusaid Wikimedia Norgga ruovttosiiddus. Evttohus maid unnimus logi – 10 – eará miellahtu dorjot, ovdanbukto jienasteapmái jahkečoahkkimis ”eará áššit”-njuolggadusaid mielde. Stivra sáhttá evttohit njuolggadusrievdadusaid.

b) Njuolggadusrievdadus lea mearriduvvon jus unnimusat 2/3 buot jienain dorjot rievdadusa.

§ 9 Heaittiheapmi

a) Jus miellahtut jienasteami bokte mearridit heaittihit searvvi, de galgá vejolaš badjebáza sirdojuvvot Wikimedia Foundation:ii. Dakkár jienasteami ferte almmuhuvvot guokte mánu ovdalgihtii, ja ¾ jienain galget doarjut heaittiheami.

b) Čielggadandihtii vejolaš gáibádusaid searvái ii galgga badjebáza sirdojuvvot ovdalgo leat gollan unnimus guhtta – 6 – mánu maŋŋá go heaittihanmearrádus lea dahkkon, jus buot gáibádusat leat mákson. Jus ležžet gáibádusat searvái ii galgga badjebáhca sirdojuvvot ovdalgo leat gollan unnimus guhttas – 6 – mánu maŋŋá go gáibádusat leat mákson.