Belèd bot

Add links
From Meta, a Wikimedia project coordination wiki
This page is a translated version of the page Bot policy and the translation is 100% complete.
Other languages:
Shortcut:
BP
Ni halaman ngasi garis besar pakem èn pedoman nyang bekaètan ama bot nyang udah diterepin di berapa proyèk (liat Bot policy/Implementation); ni bisa diperèksa tibang nyabain "Project:Bot policy" di itu wiki, nyang ngarah ke mari atawa ngalihin ke halaman belèd lokal.

Ni halaman juga' belèd di Méta, serènta pengakuran sendèwèk èn bot global. Bakal minta' aksès bot di Méta, padol dah, pegi ke Meta:Requests for adminship#Requests for bot flags.

Bot entu prosèsnya otomatis atawa separo-otomatis nyang mermak halaman dengen pemantengan orang nyang dikurangin atawa sonder pemantengan langsung. Bahna bot bisa aja ngebejeg kebisaan pengladèn atawa ngeganggu proyèk, mangka itu bot misti manut ama belèd èn pedoman sepegimana digarisin di bawah ni. Belèd ngasi garis besar pegimana itu bot bisa kanggo bakal proyèk nyang kena diterepin; bot nyang kaga' manut ama belèd bisa aja diblokir langsung ampé penggawénya mbenerin ni mas'alah atawa ada atu laèn hal nyang kaga' diakur.

Belèd

Rèkening bot

Bot misti dijalanin paké atu rèkening kepisah deri penggawénya, bahna pemermak orang jangan sampé ditengerin paké bendèra bot. Dia punya halaman pemaké kudu danta èn kiatan ngasi unjuk sebagé bot bakal ngebèdain deri pemermak orang, èn penggawé misti sedia ngejawab sebarang tanggepan sendiri. Kaga' ada pemaké nyang diijinin bakal maké naskah jawaban otomatis. Sebagèan penggawé bisa aja milih ngalihin bot punya halaman obrolan ke dia punya halaman obrolan, kalo dia punya bot kaga' diatur bakal ngendus pesen.

Pengijinan

Ada tiga cara bakal ngedapetin aksès bot di wiki.

Bot global

Bot global entu aksès nyang dikasi di mana-mana wiki nyang ngeboléin adanya bot global. Per 12 Nopèmber 2022 èn lantaran ni Rekès Tanggepan, isi-isi wiki nyang baru pada dikeja bawaannya bakal gableg bot global nyang nyala. Proyèk lokal bisa nentuin bakal maké apa kaga' itu kapan aja liwat ijma' komunitèt (liat daptar). Penggawé nyang ngajuin bendèra bot misti menuin ni pesaratan pada:
  • Penggawé bot misti mulain perhadring nyang bakalan ada 2 minggu punya lama di Steward requests/Bot status#Global bot status requests;
  • Perhadring bakal dibuka' bakal umum liwat MassMessage (Perhadring bot global baru), di mana anggota komunitèt nyang kebèngbat èn wiki bisa dilangganin;
  • Penggawé bot misti ngasi unjuk kalo kerjaan bot bolé di banyak proyèk Wikimédia. Cara nyang paling cakep bakal ngasi unjuknya entu dikasi bendèra di 5 wiki atawa lebi bakal saban atu kerjaan;
  • Penggawé kudu mastiin manut ama wiki punya pengaturan dalem hal pemakéan bendèra bot.
  • Kewontenan bot global ngasi aksès bot kewates cuman ke berapa proyèk èn wiki doang nyang ngeboléin aksès bot global. Wiki baru bawaannya ditambahin ke ni penyetèlan. Daptar tètèk bengèknya ada kesedia. (Lu bisa ngrekès bendèra bot setempat di mana bot global kaga' bolé.)

Pengakuran sendèwèk

Kalo pengakuran sendèwèk danta-danta diboléin di wiki, penggawé bot bolé ngrekès bendèra bot setempat langsung deri pengurus. Bakal menuin sarat, ni pesaratan pada kudu dipenuin:
  • ni misti diijinin ama belèd bot setempat atawa halaman rekès;
  • bot misti pepes mermak keatur sonder sonder bendèra bot paling kaga' dalem seminggu atawa ngeja 100 permakan di wiki nyang keterep bakal tujuan ngasi unjuk;
  • bot misti cuman pengalihan pengalihan-rangkep ajeg.

Ijma' Komunitèt

Kalo kaga', kalo ada komunitèt setempat nyang kebèngbat ama mrosès penerepan bot, bot misti dapet pengakuran komunitèt di halaman perhadring setempat nyang nyambung sebelonnya mermak sonder bendèra bot nyang banter atawa sonder pemantengan orang. Barang ada ijma'nya, amtenar setempat bakal nambahin bendèra, atawa pengurus bolé ngrekès nglakonin tu. Kalo kaga' ada komunitèt setempat èn kaga' kaya' kewontenan di atas, bot misti gawé sonder bendèra bot atawa kaga' gawé acan.

Pemakéan nyang kaga' bolé

  • Perobahan nyang mancing cèkcok: Bot bolé aja dipaké bakal nglakonin permakan nyang rasa-rasanya didukung ama laèn-laèn pemermak setempat; dia pada jangan sampé dipaké bakal nglakonin permakan nyang mancing cèkcok. Kalolu pèngèn nglèbarin itu bot punya lingkupan di luar deripada nyang didukung ama komunitèt, bikin catetan pasal ni hal di halaman perhadring nyang nyambung bakal mastiin kaga' ada nyang nampik. Kalo lu punya bendèra bot dikasi ama pengakuran sendèwèk, lu jangan sampé nglantasin wates sepegimana dijabarin di bawahnya "Pengakuran sendèwèk".
  • Pemungutan data: Bot kaga' bolé dipaké bakal mungut seonggok isi bakal apa-apa pemakéan nyang kaga' bekaètan langsung ama kerjaan bot nyang diakur. Ni masup juga' pemuatan halaman dinamis deri laèn pelampang, nyang bisa bikin itu pelampang didaptaritemin èn ajeg ditolak aksèsnya. Kalo lu pèngèn nyomot langsung isi seonggok atawa nèktokin proyèk, tulung comot atawa tampung lu punya jiplakan pendaringan data kita.
  • Pemerèksaan èjaan: Kaga' ada bot nyang bolé otomatis ngebetulin kesalahan sonder pengakuran komunitèt nyang kesurat, wabilkusus di ruang nama isi utama. Ni secara tèhnis kadanan di banyak basa bakal merèksa kesalahan èjaan sonder jumblah kesalahan nyang lumayan.

Pembuangan status bot global

Ijin bot global bakalan dibuang:

  • Kalo ada rekès deri penggawé bot
  • Kalo bot pepes dipaké bakal nglakonin tugas di luar nyang semistinya
  • Kalo bot, ga taunya, kaga' aktip, dengen ni hal pada:
    • Rèkening bot global dianggep kaga' aktip kalo kaga' ngeja sebarang permakan dalem setaun jengkep di mana-mana proyèk nyang ngeboléin aksès bot global.
    • Sebelon ijin rèkening bot global dibuang lantaran kekaga'aktipannya, penggawénya pasti dikasi ma'lumat paling kaga' di dia punya wiki èn Méta-Wiki.

Pedoman

Nama

Bagèn kaga' wajib, nama bot kudu danta ada kata "bot"-nya di dia punya nama pemaké biar gampil dibèdainnya ama pemermak orang; bentuk nyang paling lumbrah biasanya diambil deri penggawé punya nama pemaké (kaya' Pathosbot), atawa maké setil pembèdaan (kaya' Xenophon (bot)).

Kelekasan permakan èn jam-jam sibuk

Bot nyang gawé sonder bendèra bot kudu mermak paling kaga' dalem lat lebi deri 1 menit di antara permakan (= kurang deri 1 permakan saban semenit). Barang udah dikasi ijin èn bener dibendèrainnya, tu bot pada kudu gawé dalem lat paling kaga' 5 sekon (12 permakan saban semenit). Bot kudu jangan sampé gawé pas jam-jam sibuk, sebab tu bakalan lekas maké kebisaan pengladèn nyang kudunya bakal dibagi juga' bakal pembaca èn pemermak orang. Di ni jem pada, tu bot kudu pada gawénya dalem lat 20 sekon (3 permakan saban semenit) bakal ngirit kebisaan.

Bot punya kegancangan permakan bisa kepantesan dengen sendèwèknya berales muatan ladènannya (ngadat pengladèn pendaringan data bawahan) tibang nglampirin patokan tambahan ke kèteng kuéri deri saban URL nyang diminta; liat dokumèntasi ngadat paling banter di médiawiki.

Pemantengan

Kalo bot kaga' dinyatain secara umum gawé sendèwèk, penggawé kudu tetep sedia, kali-kali bakal merèksa ada pesen, èn siap-siap matiin itu bot kalo kaga' gawé sepegimana mestinya atawa ada sambatan nyang diterima. Kalo penggawé kaga' sedia, bot bisa aja diblokir ampé tu mas'alah diseleséin.

Plaktèk paling ajib

Dimohon baca wikitech:Help:Toolforge/Developing successful tools bakal saran kuat nyang ngeja idup mingkin gancil bakal lu èn bakal semua orang entinya!

Ringkesnya:

  • Comot ongji
  • Terebitin kode
  • Gableg hopèng sepengopènan
  • Tulis berapa dokumèntasi

Liat juga'

Retrieved from "https://meta.wikimedia.org/w/index.php?title=Bot_policy/bew&oldid=26192725"