Pondidikan/Abal/Manom 2023/Kopoimaganan Kalab Wiki Kent id Persidangan Wikimania 2023
"Kopoimaganan Kalab Wiki Kent id Persidangan Wikimania 2023
Kalab Wiki Kent nopo nga pinoimagon di Dr. Hamidah Samsudin, Pongarah Institut Ponginabasan Mongingia Kampus Kent (IPG), Sabah ontok di 18 Magus id Longkod Konvensyen om Kopokitanan Suntec. Tudu koponuridangan kalab diti nopo nga popointutun kokomoi moomogun pribumi, loolobi montok koubasanan om boros Kadazandusun, miampai popoingkawas do koubasanan om boros moi lobi do ointutunan kumaa tulun sompomogunan id taang global.
Miampai koponuridangan kalab diti, mokiikinobos mantad IPG i sumiliu sabaagi do mongingia om luguan momuruan do boros diti nga kikosiwatan do manakadai id projek Wikipedia miampai tumilombus do manamong om popoingkawas boros diti.
Dody Ismoyo, ponorikohon do Wikimedia Community User Group Malaysia, minoboros do strategi digitalisasi nopo nga oponsol id goos do mamantang toinsanan boros id Malaysia mantad mogikaakawo tinaru om etnik moi do au atagak tu okuri nodi o pomogunoon boros dii id timpu diti mantad do tongosukod wagu.
Nokotindapou id kopoimaganan Kalab Wiki Kent nopo nga ii Zandi Linah Bagu, Luguan Jabatan Bahasa Kadazandusun; Gundohing Mohd. Taufik Rosman; Dr. Rosie Jhonny; om Zandi Rosmawati Ebbie. Kiwaa nogi walu sukarilawan toi ko mokiikinobos mantad do projek Wikipedia id IPG Kent i nokotindapou. Toinsanan diolo diti, miampai mamampayat suai i nokorikot, nokotorimo do biasiswa pinotounda mantad do Wikimedia Community User Group Malaysia om Wikimedia Foundation. Suai ko ii, nokorikot nogi o komuniti miagal ko Paiwan Wikimedians User Group, om suusuai po Wikimedian mantad Malaysia id ababayan kopoimaganan diti.
Kopoimaganan Kalab Wiki Kent nopo nga nadadi miampai sokodung do Yayasan Wikimedia om Wikimedia Malaysia, i pinopoinlaab do program sompogunan om pinopotounda sokodung kousinan. Maya koponuridangan do kalab diti, alansan daa kaanu magangat lobi ogumu o sukarilawan i kaanu manakadai kumaa projek Wikipedia, loolobi kopio sukod wagu.