Видот Rhizomnium punctatum или Mnium punctatum е дел од групата на фолиозни мовови за кои карактеристично е тоа што гаметофитот е изграден од ризоиди, каулоид и филоиди. Ризоидите може да се споредат со кореновите влакненца, каулоидот со стебленцето, додека филоидите со листовите на подобро развиените виши растенија. Гаметофитот се размножува полово и формира полови органи – гаметангиуми кои најчесто се сместени на врвот од каулоидот, заштитени со врвни филоиди. Помеѓу гаметагиумите се наоѓаат парафизи чија функција е одржување на влажноста. Помеѓу машките полови структури (антеридиуми) се наоѓаат парафизи чии врвни клетки се топчесто проширени. Од друга страна, клетките кои ги градат парафизите кои се наоѓаат меѓу женските полови органи (архегониуми), се со ист облик. Машките и женските полови структури се образуваат на посебни единки поради што овој вид е дводомно растение.

За подготовка на нативен препарат и изолација на гаметангиуми со соодветни парафизи потребно е: предметно и покровно стакленце, капалка за вода, пинцета и примерок од растителниот материјал. На предметно стакленце, со капалката за вода се капнува, средишно, една поголема капка вода и странично, помала капка вода. Со помош на пинцета се отстрануваат врните филоиди со цел да се ослободи врвниот дел од каулоидот - место каде што се сместени половите структури и парафизите. Ослободениот врвен дел на калулоидот се поставува во средишната капка вода на предметното стакленце и се мацерира со помош на пинцета. Гаметангиумите и парафизите се откинуваат и ослободуваат во капката вода. Вишокот растителен материјал се отстранува од капката вода. Со покровно стакленце, поставено под агол од 45°, се развлекува страничната капка вода кон средишната. По нивно спојување, покровното стакленце се спушта на предметното стакленце. Вака подготвените нативни препарати се спремни за микроскопирање.