Bassel Khartabil
Nos deplora le perdita de nostre collega Bassel Khartabil.
.jpg)
Qui esseva Bassel Khartabil?
- Bassel Khartabil esseva un programmator de software a codice aperte e voluntario de Wikipedia de origine syrio-palestin.
- Ille esseva un del prime contributores, frequente ben que anonyme, del Wikipedia in arabe. Ille contribueva etiam a Mozilla Firefox, e fundava e conduceva le projecto Creative Commons Syria; su labor pro le adoption del licentias Creative Commons in lingua arabe ha essite describite como "pivotal".
- Bassel esseva un figura de importantia amplemente recognoscite inter le communitate internet nascente in Syria. In 2013 ille recipeva le "Digital Freedom Award" (Premio del Libertate Digital) presentate cata anno per le organisation sin scopo lucrative Index on Censorship (Indice sur le Censura). In 2012, ille esseva etiam nominate per le periodico Foreign Policy (Politica Estranier) como un del "Top Global Thinkers" (melior pensatores del mundo) pro "insister, malgrado tote le adversitates, pro un revolution syrie pacific.”
Que ha evenite a Bassel?
- Bassel esseva arrestate per fortias de intelligentia militar syrie le 15 de martio 2012. Desde alora, ille ha essite detenite in prision sin processo o accusation, e ha suffrite tortura e maltractamento grave al manos del personal carcerari syrie, incluse un periodo de isolamento de 8 menses.
- In decembre 2012, Bassel esseva menate ante un accusator militar. Durante su curte audientia, Bassel non ha potite presentar su defensa e non habeva accesso a representation juridic. Postea, ille esseva incarcerate in le prision de Adra al bordo de Damasco pro attender su judicamento.
- Le 3 de octobre 2015, Bassel esseva displaciate de su cellula al prision civil de Adra verso un loco secrete, e nihil esseva audite de ille postea. In novembre, notitias non confirmate emergeva de su familia que ille poterea haber essite condemnate al morte per un tribunal militar secrete, sin derecto de appello. In augusto 2017, il esseva revelate que Khartabil habeva essite executate per le regime syrie poco post su disparition in 2015.
Qui supportava Bassel?
- In april 2015, le Gruppo de Labor sur le Detention Arbitrari del Nationes Unite appellava pro le liberation immediate de Bassel e describeva su detention continuate como "arbitrari". Le Gruppo ha etiam specificate que le imprisionamento de Bassel constitueva un violation del articulos 9, 14 e 19 del Convention international sur le derectos civil e politic, notante que le governamento syrie ha fallite de fornir "alcun information indicante que le activitate pacific e non violente del Sr. Khartabil's constitueva un menacia pro le securitate national o le ordine public".
- Postea, plus de 30 organisationes pro le derectos human (como Amnesty International, Human Rights Watch, Index on Censorship, e Gulf Center for Human Rights) ha signate un littera aperte exhortante le governamento syrie a revelar ubi Bassel se trovava e a reunir le con su familia. Le consilio de administration de Creative Commons etiam approbava un resolution appellante al liberation de Bassel, and le Media Lab de MIT offereva a Bassel un position de recercator scientific al "Center for Civic Media" pro laborar a projectos pro render le historia de Syria disponibile al mundo.
- Le Fundation Wikimedia, le organisation que alberga Wikipedia, etiam supportava le liberation de Bassel. In addition a informar le pressa sur le situation de Bassel, le Fundation ha parlate publicamente del question a eventos e sur medios social. In martio de 2014, illo organisava un "edit-a-thon" de Wikipedia in honor de Bassel, e ha remanite in contacto directe con su familia.
Ubi pote io leger plus sur Bassel?
- Il ha articulos de Wikipedia sur Bassel in plus de 15 linguas, como anglese, arabe, francese, germano, espaniol e alteres. (Totes es ligate a partir de su entrata de Wikidata.)
- Tu pote etiam essayar iste ligamines: